Troch provinsje Fryslân
Provinsje en gemeente Noardeast helje mei-inoar weardefolle plakken en ferhalen op
Wat is fan wearde yn ús Fryske doarpen en stêden? Wat wolle wy beskermje, hokker wearden kinne wy ynsette by it meitsjen fan plannen foar de takomst? Foar it opheljen dêrfan wurkje de provinsje Fryslân en gemeente Noardeast-Fryslân no earst mei-inoar gear.
Op tiisdei 24 septimber iepene deputearre Sijbe Knol de Fryske doarpe-atlas. Dat barde tagelyk mei de ôftraap foar de doarpsbiografyen fan Noardeast-Fryslân troch wethâlder Hanneke Jouta. Dat is fansels gjin tafal; yn de doarpe-atlas komt nammentlik ynformaasje fan gemeenten en ynwenners.
Noardeast tekenet earst ferhalen en plakken fan tweintich doarpen op
Dat docht de gemeente yn ’e mande mei doarpsbewenners, Lânskipsbehear Fryslân en Wurkjend Lânskip. Alles wurdt bondele en dat soarget foar in moaie basis by nije plannen en ûntjouwingen. Yn Eanjum wurdt bygelyks op inisjatyf fan it doarp wurke oan it opknappen fan de dykkûpueres. Hanneke Jouta: “Wy neame de weardefolle plakken en ferhalen ‘ús goud’. Wat wy noch net ûntdutsen hawwe, wolle wy mei ynwenners ‘opgrave’. By nije plannen en ûntwikkelingen pakke wy dan de skatkiste fol skiednis, ferhalen en plakken derby en litte ús ynspirearje. Faaks binne der keppelkânsen.”
Doarpe-atlas lit de skiednis sjen, monuminten en kaarten fan doarpen en stêden
Dy binne bygelyks yndield yn tolve doarpstypen: fan terpdoarp oant feanûntginningsdoarp. Ek binne foar alle doarpen en alle stêden seis kaartlagen fan 1850 oant hjoed-de-dei ta te sjen. Dêrmei kinst de groei yn de rin fan de tiid sjen. Deputearre Sijbe Knol fynt it dielen fan weardefolle ferhalen en plakken wichtich: “It helpt by it meitsjen fan plannen. Oft it no giet om in kuierpaad of i fyzje fan it doarp, de atlas ynspirearret en jout rjochting.” Foto’s, ferhalen en kennis fan ynwenners en oare gemeenten binne fan grutte wearde foar de doarpe-atlas. It is in libben dokumint dat troch gearwurking hieltyd fierder groeit. Sjoch op www.dorpenatlas.frl en draach by.